ഒരുശത്രു വേണം കറുപ്പും വെളുപ്പുമാ-
യിഴചേർന്ന ചതുരക്കളങ്ങളിലാടുവാൻ.
പടവെട്ടുവാൻ, രുധിരപാനോത്സവത്തിന്റ
ലഹരിയിലുന്മാദനൃത്തം ചവിട്ടുവാൻ,
ഒരുശത്രു വേണം തളർന്ന പഞ്ചേന്ദ്രിയ-
പ്പടയാളികൾക്കു സുജേമനം നല്കുവാൻ.
മുഖമറ്റ ജനവിസ്മയത്തിന്റ പെരുവെള്ള-
മലറിക്കുതിക്കുന്ന പഥസഞ്ചയങ്ങളിൽ,
നിഴലുകൾ മാത്രമായലയുന്ന സ്വത്വത്തി-
നഴകും പ്രഭാവവും വാർത്തെടുത്തീടുവാൻ
ഒരുശത്രു വേണം; കുഴൽവിളി, കൊമ്പൊലി
പടഹധ്വനി കൊടിക്കൂറപാറുന്നൊരീ
പടനിലത്തുത്സവമാടിത്തിമർക്കുവാൻ,
ശരമാരി കൊണ്ടൊളിചിമ്മും പ്രഭാകര-
ദ്യുതി മറച്ചീടുവാൻ, ശ്യാമപക്ഷംപോലെ
ചിറകുകളോരോന്നരിഞ്ഞെടുത്തീടുവാൻ,
അണതകർത്തലറിക്കുതിച്ചെത്തി ഇണയുടെ
അടരാൻകൊതിക്കുന്ന ചുണ്ടിലെ ചുംബന-
പ്പനിനീർസുമങ്ങൾ കവർന്നെടുത്തീടുവാൻ,
വിജിഗീഷുവായ് നെഞ്ചിലിടിമുഴക്കം തീർത്തു
മൃഗമായി ചാട്ടവാറടിപോലെ ഉന്മത്ത-
ഭരിതനായരിയെത്തഴഞ്ഞു തോൽപ്പിക്കുവാൻ,
മദനോത്സവത്തിന്റ സാന്ധ്യമയക്കത്തി-
ലലസഹാസത്തിന്റെ മഴയുതിർത്തീടുവാ-
നൊരുശത്രു വേണം; പരാജയപ്പടുകുഴി
മണലിട്ടുമൂടുവാൻ, പഴിപറഞ്ഞീടുവാൻ
ഗണിതങ്ങൾ തെറ്റവേ, നിലപാടു മാറ്റവേ
പഴിചാരുവാൻ, പിന്നെ മൊഴിയഴിച്ചീടുവാൻ,
നിഴൽയുദ്ധമാടിപ്പലായനം ചെയ്യുന്ന
ഒരുശത്രു വേണം; ഒളിയമ്പുകൊണ്ടൊരു
തലയറുത്തീടുവാൻ, വീരനായ്ത്തീരുവാൻ,
കനകസിംഹാസനം, ചെങ്കോൽ, കിരീടവും,
പറുദീസതോൽക്കുന്ന അന്തപ്പുരങ്ങളും,
നവധാന്യമൊഴിയാത്ത കലവറ, തോരാത്ത
കളധൗതവർഷം കവിഞ്ഞ ഭൺഡാരവും,
പകലന്തി ഒാടിയാൽതീരാത്തഭൂമിയും,
പ്രജകളും, പ്രജയെനയിക്കുന്ന പ്രജ്ഞയും,
കരഗതമാക്കുവാൻ പ്രഥമനായ് തീരുവാ-
നൊരുശത്രു കണിശമായ് മുന്നിലുണ്ടാവണം.
രുധിരം നനച്ച കൊടിക്കൂറപാറവെ
ചിതയിൽ കബന്ധമെരിഞ്ഞടങ്ങീടവേ,
ഇരുളിൻകയത്തിലെ ദീർഘനിശ്വാസങ്ങ-
ളണപൊട്ടി എൻകാതിലലമുറയാകവേ,
പടികൾകടക്കുവാൻ, ഗിരികടന്നീടുവാൻ
വഴിമുട്ടിയകതാരു കൊതിപൂണ്ടുനിൽക്കവേ,
വിരസമായ്തീരും നിമേഷങ്ങൾ മല്ലിട്ടു
നിഭൃതപഞ്ചേന്ദ്രിയം ക്ഷമയറ്റു നിൽക്കവെ
തിരയുന്നു ഞാനെന്റശത്രുവെ തിരയുന്നു.
ഒരു മത്സരത്തിന്റ പോർവിളി കേൾക്കുവാൻ
എവിടെ നീ? എന്നശ്വമിടയുന്നു, ലക്ഷ്യങ്ങ-
ളിനിയില്ല, നാഭിയിൽ കടലിരമ്പുന്നു, കാൽ
തളരുന്നു, വാക്കിലോ ചില്ലുകൾ ചോരുന്നു.
എവിടെ നീ ശത്രുവേ? നീ ഇല്ല എങ്കിലീ
പടയോട്ടമിനിയില്ല, പടയണി വേറില്ല,
നീ ഇല്ല എങ്കിലീ ഞാനില്ല, എന്നൂറ്റ-
മൂടറ്റ പാവിന്നഹങ്കാരമല്ലയൊ?
അറിയുന്നു, നീ എന്നിൽ നിറയും ഉഷസ്സിന്റെ
നെറിവായിരുന്നു, കൺപോളകൾചിമ്മാത്ത
ഉണർവ്വായിരുന്നു, ജാഗ്രത്തിൻ പ്രചണ്ഡമാം
ദ്യുതിയായിരുന്നു നീ ഞാനായി മാറുന്നു.
