ഓർക്കുവാനാവുമോ എന്റെ നാമം നിന-
ക്കാർത്തലച്ചെത്തും മഴയിൽ നിന്നും, ചുരം-
ചാരിയാമിക്കൊടുങ്കാറ്റിൽ നിന്നും, മേഘ-
ഘോരഗീതത്തിന്റെ ശീലിൽനിന്നും, ക്ഷിപ്ര-
സാക്ഷിയീ മിന്നൽപ്പിണരിൽനിന്നും, നമ്മ-
ളാദ്യമായ് കണ്ടു, കരംകോർത്തു പിന്നിട്ട,
വാക്കുകൾതീർത്ത രഥത്തിൽ കരേറിയ,
സാർത്ഥകതീർത്ഥസ്ഥലിയിൽ നിന്നും, വാക-
പൂത്തു, മണംചിന്നി, നിന്നുടയാടയിൽ
പേർത്തും പൊഴിച്ചിട്ട ശോണപുഷ്പംകൊണ്ടു
കാറ്റു വിരിച്ച തല്പത്തിൽ നിന്നും, വീണ്ടു-
മാത്മഗീതം പോലലഞ്ഞെത്തുമീയുഷ-
ക്കാറ്റിലലിഞ്ഞു പടർന്ന സുഗന്ധത്തി-
ലേറ്റമുറഞ്ഞ കുളിരിൽനിന്നും, നഷ്ട-
സ്വപ്നങ്ങൾ തീർത്ത ഖനിജലത്തിൽ നീന്തി-
യെത്തും മരാളങ്ങൾ തൂവൽ കൊഴിക്കുമീ-
ദുഃഖ കാന്താര നിഴലിൽ നിന്നും, തുള്ളി-
തോരാതെ പെയ്യുന്ന കണ്ണുനീരിൽ വെന്തു-
നോവാതെ നോവുന്ന ഗദ്ഗദധാന്യങ്ങൾ
മെല്ലെപ്പകുത്താഹരിച്ചോരിരവിലെ
തല്ലിക്കൊഴിച്ചിട്ട മാദക ശോഭയിൽ
ഫുല്ലമാകാത്ത കിനാവിൽനിന്നും നിന-
ക്കോർക്കുവാനാകുമോ എന്റെ നാമം?
