കൊടുങ്കാറ്റുണ്ടാകുന്നത്

ചില കൊടുങ്കാറ്റുകൾ അങ്ങനെയാണ്.
ന്യൂനമർദ്ദം രൂപപ്പെടില്ല.
കരിമേഘങ്ങൾ ഉരുണ്ടുകൂടില്ല.
അതീന്ദ്രിയബോധമുള്ള തെരുവുനായ്ക്കൾ
ഓലിയിടില്ല.

അതു പൊടുന്നനെ ഉടുമുണ്ടഴിച്ചു
നമ്മെ നഗ്നരാക്കുന്നു.
വടവൃക്ഷങ്ങൾ മറിഞ്ഞു വീഴുന്നു.
വൈക്കോൽക്കൂനകൾ അപ്രത്യക്ഷമാകുന്നു.
ചുവരുകൾക്കു മുകളിൽ ആകാശം മാത്രമാകുന്നു.
പൊടുന്നനെ എല്ലാം ശാന്തമാകുന്നു.
നാം ആകസ്മികതയിൽ വോഡ്ക ചേർത്തു
നുണഞ്ഞിറക്കുന്നു.